Dar-e-khyaal Bhi Kholein Siyah Shab Bhi Karein

Dar-e-khyaal bhi kholein siyah shab bhi karein,
Phir us ke baad tujhe sochein ye ghazab bhi karein..

Wo jis ne shaam ke maathe pe haath phera hai,
Hum us charagh-e-hawa-saaz ka adab bhi karein..

Siyahiyaan si bikharne lagi hain seene mein,
Ab us sitara-e-shab-taab ki talab bhi karein..

Ye imtiyaaz zaroori hai ab ibaadat mein,
Wahi dua jo nazar kar rahi hai lab bhi karein..

Kee jaise khwaab dikhana tasalliyaan dena
Kuchh ek kaam mohabbat mein be-sabab bhi karein..

Main jaanta hun ke tabeer hi nahin mumkin,
Wo mere khwaab ki tashreeh chahe jab bhi karein..

Shikast-e-khwab ki manzil bhi kab nayi hai humein,
Wahi jo karte chale aayein hain so ab bhi karein..!!

"Abhishek Shukla"
__________

Sitara-e-shab-taab = star of bright night,
Imtiyaaz = discrimination, discernment, distinction,