Chhote chhote se mafadaat liye phirte hain,
Dar-ba-dar khud ko jo din raat liye phirte hain,
Apni majrooh anaaon ko dilaase de kar,
Haath mein kaasa-e-khairaat liye phirte hain,
Shahar mein hum ne suna hai ke tere shoala-nawa,
Kuchh sulagte hue naghmaat liye phirte hain,
Mukhtalif apni kahaani hai zamane bhar se,
Munfarid hum ghum-e-haalaat liye phirte hain,
Ek hum hain ke ghum-e-dahr se fursat hi nahin,
Ek wo hain ke ghum-e-zaat liye phirte hain.!!
"Aitebaar Sajid"
No comments:
Post a Comment