Be-kaif Dil Hai Aur Jiye Ja Raha Hun Main

Be-kaif dil hai aur jiye ja raha hun main,
Khaali hai sheesha aur piye ja raha hun main,

Paiham jo aah aah kiye ja raha hun main,
Daulat hai ghum zakaat diye ja raha hun main,

Majboori-e-kamaal-e-mohabbat to dekhna,
Jeena nahin qubool jiye ja raha hun main,

Wo dil kahaan hai ab ki jise pyaar kijiye,
Majbooriyan hain saath diye ja raha hun main,

Rukhsat hui shabaab ke humraah zindagi,
Kahne ki baat hai ke jiye ja raha hun main,

Pahle sharab zeest thi ab zeest hai sharab,
Koi pila raha hai piye ja raha hun main.!!

"Jigar Muradabadi"