Bahut Sajaaye The Aankhon Mein Khwaab Main Ne Bhi

Bahut sajaaye the aankhon mein khwaab main ne bhi,
Sahe hain us ke liye ye azaab main ne bhi,

Judaaiyon ki khalish us ne bhi na zaahir ki,
Chhupaye apne ghum o iztiraab main ne bhi,

Diye bujha ke sar-e-shaam so gaya tha wo,
Bitaai so ke shab-e-mahtaab main ne bhi,

Yahi nahin ke mujhe us ne dard-e-hijr diya,
Judaaiyon ka diya hai jawaab main ne bhi,

Kisi ne khoon mein tar chudiyaan jo bheji hain,
Likhi hai khoon-e-jigar se kitaab main ne bhi,

Khizaa'n ka waar bahut kaar-gar tha dil pe magar,
Bahut bacha ke rakha ye gulaab main ne bhi.!!

"Aitebaar Sajid"