Ai sanam tujh ko hum bhula na sake,
Dil se daagh-e-wafa mita na sake..
Allah Allah us aastaa'n ki kashish,
Sar jhukaya to sar utha na sake..
Mit gaye shauq-e-deed mein lekin,
Aap jalwa humein dikha na sake..
Teri chahat mein dard wo paaya,
Hum zamane mein chain pa na sake..
De ke dil tum ko jaan bhi de di,
Phir bhi apna tumhein bana na sake..
Jab se nisbat hui tere dar se,
Hum kisi dar pe sar jhuka na sake..
Ishq mein ye ajab tamasha hai,
Un ko paaya to khud ko pa na sake..
Aisi badli hawa zamane ki,
Zakhm seene ke muskura na sake..
Tum 'Fana' ki lahad pe baad-e-fana,
Aa ke do phool bhi chadha na sake.!!
"Fana Bulandshahri"
No comments:
Post a Comment