Ab Unhein Apni Adaon Se Hijaab Aata Hai

Ab unhein apni adaon se hijaab aata hai,
Chashm-e-bad-door dulhan ban ke shabaab aata hai..

Hijr mein bhi mujhe imdaad-e-ajal hai darkaar,
Meri turbat pe na aa tujh se hijaab aata hai..

Deed aakhir hai ulat dijiye chehre se naqaab,
Aaj mushtaaq ke chehre pe naqaab aata hai..

Kis taraf josh-e-karam teri nigaahein utthin,
Kaun mahshar mein saza-waar-e-itaab aata hai..

Maut ki neend bhi ab chain se sona maloom,
Ke janaze pe wo ghaarat-gar-e-khwab aata hai..

Dil ko is tarah thehar jaane ki aadat to na thi,
Kyun ajal kya mere naame ka jawaab aata hai..

Jalwa-e-rang hai nairang-e-taqaza-e-nigaah,
Koi majboor tamasha-e-saraab aata hai..

Ho gaya khoon tere hijr mein dil ka shayad,
Ab tasawwur bhi tera naqsh-bar-aab aata hai..

Milti julti hai meri umr-e-do-roza 'Faani',
Ji bhar aata hai agar zikr-e-habaab aata hai.!!

"Faani Badayuni"
__________

Chashm-e-bad-door = May God preserve you from the evil eye, malicious glances be away from you,
Imdaad-e-ajal = help from death,
Mushtaaq = desirous/ eager,
Saza-waar-e-itaab = deserving punishment,
Ghaarat-gar-e-khwab = spoiler of dream,
Naame = letters,
Nairang-e-taqaza-e-nigaah = change of demands of glance,
Tamasha-e-saraab = spectacle of the mirage,
Naqsh-bar-aab = a transient impression,
Zikr-e-habaab = mention of the bubble,