Apni jannat mujhe dikhla na saka tu waaiz,
Koocha-e-yaar mein chal dekh le jannat meri..
Saari duniya se anokhi hai zamane se juda,
Nemat-e-khaas hai Allah re qismat meri..
Shikwa-e-hijr pe sar kaat ke farmaate hain,
Phir karoge kabhi is munh se shikayat meri..
Teri qudrat ka nazara hai mera ijz gunaah,
Teri rahmat ka ishaara hai nadamat meri..
Lo tabassum bhi shareek-e-nigah-e-naaz hua,
Aaj kuchh aur badha di gayi qeemat meri.!!
Faiz yak lamha-e-deedar salamat 'Faani',
Ghum ki har roz hai badhti hui daulat meri.!!
"Faani Badayuni"
__________
Ijz = modesty,
Nadamat = Repentance, Regret,
Faiz = success, grace, favour, bounty,
No comments:
Post a Comment