Ab Itni Saadgi Laayen Kahaan Se

Ab itni saadgi laayen kahaan se 
Zameen ki khair maagen aasmaa'n se...

Gar chaahen to wo deewar kar dein 
Humein ab kuchh nahi kahna zubaa'n se..

Sitaara hi nahi jab saath deta 
To kashti kaam le kya baadbaa'n se...

Bhatakney se mile fursat to puuchhen 
Pata manzil ka meer-e-kaarvaa'n se...

Tawajjoh barq ki haasil rahi hai 
So hai aazaad fikr-e-aashiya'n se...

Hawa ko raz-daa'n hum ne banaaya 
Aur ab naraaz khushbu ke bayaa'n se...

Zaroori ho gayi hai dil ki zeenat 
Makee'n pahchaaney jaate hain makaa'n se...

Fanaa-fil-ishq hona chahte they 
Magar fursat na thi kaar-e-jahaan se...

Wagarna fasl-e-gul ki qadr kya thi 
Babi hikmat hai waabasta Khizaa'n se...

Kisi ne baat ki thi hans ke shaayad 
Zamaaney bhar se hain hum khud gumaa'n se...

Main ek ek teer pe khud dhaal banti 
Agar hota wo dushman ki kamaa'n se...

Jo sabza dekh kar khemey lagaayen 
Unhein takleef kyuun pahunchey Khizaa'n se...

Jo apne ped jaltey chhod jaayen 
Unhein kya haq ki roothein baaghbaa'n se..!!

- Parween Shakir