Uttha Hai Abr Josh Ka Aalam Liye Hue

Uttha hai abr josh ka aalam liye hue,
Baitha hun main bhi deeda-e-pur-nam liye hue,

Saaqi ki chashm-e-mast ka aalam na poochhiye,
Ek ek nigaah hai kayi aalam liye hue,

Shabnam nahin gulon pe ye qatre hain ashk ke,
Guzra hai koi deeda-e-pur-nam liye hue,

Tay kar raha hun ishq ki dushwaar manzilein,
Aah-e-daraaz o girya-e-paiham liye hue,

Uth ai naqaab-e-yaar ke baithe hain der se,
Kitne ghareeb deeda-e-pur-nam liye hue,

Sunta hun un ki bazm mein chhalkenge aaj jaam,
Main bhi chala hun deeda-e-pur-nam liye hue,

Moti ki qadr sab ko hai phoolon ko dekhiye,
Kya hans rahe hain qatra-e-shabnam liye hue,

Josh-e-junoon mein lutf-e-tasawwur na poochhiye,
Phirte hain saath saath unhein hum liye hue,

Dil ki lagi na un se bujhi aaj tak 'Jaleel',
Dariya hain garche deeda-e-pur-nam liye hue..!!

"Jaleel Manikpuri"