Unhein Aadat, Hamein Lazzat Sitam Ki

Unhein aadat, hamein lazzat sitam ki,
Udhar shamsheer idhar taqdeer chamki,

Kahun kya dard-e-dil kab se badha hai,
Nigaah-e-lutf tum ne jab se kam ki,

Qadam choomenge tere ho ke paamaal,
Chalenge chaal hum naqsh-e-qadam ki,

Yahaan tak un ke waade jhooth nikle,
Qasam ko bhi hui haajat qasam ki,

Wo zulf-e-mushk-bu bikhri hui thi,
Khuli chori naseem-e-subah-dam ki,

Yahaan tak un ko paas-e-raaz-e-khat tha,
Ke khaame ki zabaan pahle qalam ki,

Zameen par is ada se paanw rakkha,
Ke aankhein khul gayin naqsh-e-qadam ki,

Kahaan peeri mein wo raushan-bayaani,
Zabaan to hai charagh-e-subah-dam ki,

Kahaan hum aur kahaan bakhshish humari
'Jaleel' ek mauj bhi abr-e-karam ki..!!

"Jaleel Manikpuri"
___________________________
Paamaal = trodden, ruined, trampled,
Khaame = pen, writing-reed,