Har Lamha Zulmaton Ki Khudaai Ka Waqt Hai

Har lamha zulmaton ki khudaai ka waqt hai,
Shayad kisi ki chehra-numaai ka waqt hai,

Kahti hai saahilon se ye jaate samay ki dhoop,
Hushyaar, naddiyon ki chadhaai ka waqt hai,

Hoti hai shaam aankh se aansu rawaan hue,
Ye waqt qaidiyon ki rihaai ka waqt hai,

Koi bhi waqt ho kabhi hota nahin juda,
Kitna azeez us ki judaai ka waqt hai,

Dil ne kaha ki shaam-e-shab-e-wasl se na bhaag,
Ab pak chuki hai fasl kataai ka waqt hai,

Main ne kaha ki dekh ye main ye hawa ye raat,
Us ne kaha ki meri padhaai ka waqt hai..!!

"Ahmad Mushtaq"