Kahaan Aa Ke Rukne The Raaste

Kahaan aa ke rukne the raaste, kahaan mod tha use bhool ja,
Wo jo mil gaya use yaad rakh, jo nahin mila use bhool ja..

Wo tere naseeb ki baarishein kisi aur chhat pe baras gayin,
Dil-e-be'khabar meri baat sun, use bhul ja use bhool ja..

Main to gum tha tere hi dhyaan mein, teri aas tere gumaan mein,
Saba kah gayi mere kaan mein, mere saath aa, use bhool ja..

Kisi aankh mein nahin ashk-e-ghum, tere baad kuchh bhi nahin hai kam,
Tujhe zindagi ne bhula diya, tu bhi muskura, use bhool ja..

Kahin chaak-e-jaan ka rafu nahin, kisi aasteen pe lahu nahin,
Ke shaheed-e-raah-e-malaal ka nahin Khoon-baha, use bhool ja..

Kyun ata hua hai ghubar mein, ghum-e-zindagi ke fishaar mein,
Wo jo dard tha tere bakht mein, so wo ho gaya, use bhool ja..

Tujhe chaand ban ke mila tha jo, tere saahilon pe khila tha jo,
Oo tha ek dariya wisaal ka, so utar gaya use bhool ja.!!

"Amjad Islam Amjad"