Baaqi Jahaan Mein Qais Na Farhaad Rah Gaya

Baaqi jahaan mein qais na farhaad rah gaya,
Afsaana aashiqon ka faqat yaad rah gaya,

Ye sakht-jaan to qatl se nashaad rah gaya,
Khanjar chala to baazu-e-jallaad rah gaya,

Paabandiyo'n ne ishq ki bekas rakha mujhe,
Main sau aseeriyo'n mein bhi aazaad rah gaya,

Chashm-e-sanam ne yoon to bigaade hazaar ghar,
Ek kaaba chand roz ko aabaad rah gaya,

Mahshar mein jaa-e-shikwa kiya shukr yaar ka,
Jo bhoolna tha mujh ko wahi yaad rah gaya,

Un ki to ban padi ke lagi jaan muft haath,
Teri girah mein kya dil-e-nashaad rah gaya,

Pur-noor ho rahega ye zulmat-kada agar,
Dil mein buto'n ka shauq-e-khuda-daad rah gaya,

Yoon aankh un ki kar ke ishaara palat gai,
Goya ke lab se ho ke kuchh irshaad rah gaya,

Naaseh ka ji chala tha humaari tarah magar,
Ulfat ki dekh dekh ke uftaad rah gaya,

Hain tere dil mein sab ke thhikane bure bhale,
Main khanama'n-kharaab hi barbaad rah gaya,

Wo din gaye ke thi mere seene mein kuchh kharaash,
Ab dil kahaan hai dil ka nishaan yaad rah gaya,

Soorat ko teri dekh ke khinchti hai jaan-e-khalq,
Dil apna thaam thaam ke bahzad rah gaya,

Ai 'Dagh' dil hi dil mein ghule zabt-e-ishq se,
Afsos shauq-e-naala-o-fariyaad rah gaya.!!

"Dagh Dehlvi"
_____________

Sakht-jaan = callous,
Nashaad = cheerless, unhappy
ow-spirited, joyless,
Aseeriyo'n = imprisonments,
Jaa-e-shikwa = place of complain,
Zulmat-kada = a very dark place,
Shauq-e-khuda-daad = God-gifted passion, pursuit,
Uftaad = accident, distress, calamity, difficulties,
Khanama'n-kharaab = runied home,
Kharaash = bruise,
Jaan-e-khalq = life of public,
Bahzad = name of an ancient Irani artist,
Shauq-e-naala-o-fariyaad = habit of grief and appeal,
____________________

باقی جہاں میں قیس نہ فرہاد رہ گیا
افسانہ عاشقوں کا فقط یاد رہ گیا..

یہ سخت جاں تو قتل سے ناشاد رہ گیا
خنجر چلا تو بازوئے جلاد رہ گیا..

پابندیوں نے عشق کی بیکس رکھا مجھے
میں سو اسیریوں میں بھی آزاد رہ گیا..

چشم صنم نے یوں تو بگاڑے ہزار گھر
اک کعبہ چند روز کو آباد رہ گیا..

محشر میں جائے شکوہ کیا شکر یار کا
جو بھولنا تھا مجھ کو وہی یاد رہ گیا..

ان کی تو بن پڑی کہ لگی جان مفت ہاتھ
تیری گرہ میں کیا دل ناشاد رہ گیا..

پر نور ہو رہے گا یہ ظلمت کدہ اگر
دل میں بتوں کا شوق خداداد رہ گیا..

یوں آنکھ ان کی کر کے اشارہ پلٹ گئی
گویا کہ لب سے ہو کے کچھ ارشاد رہ گیا..

ناصح کا جی چلا تھا ہماری طرح مگر
الفت کی دیکھ دیکھ کے افتاد رہ گیا..

ہیں تیرے دل میں سب کے ٹھکانے برے بھلے
میں خانماں خراب ہی برباد رہ گیا..

وہ دن گئے کہ تھی مرے سینے میں کچھ خراش
اب دل کہاں ہے دل کا نشاں یاد رہ گیا..

صورت کو تیری دیکھ کے کھنچتی ہے جان خلق
دل اپنا تھام تھام کے بہزاد رہ گیا..

اے داغؔ دل ہی دل میں گھلے ضبط عشق سے
افسوس شوق نالہ و فریاد رہ گیا..