Tere Liye Chale The Hum Tere Liye Thehar Gaye

Tere liye chale the hum tere liye thehar gaye...
Tu ne kaha to ji uthe tu ne kaha to mar gaye.!

Kat hi gai judaai bhi kab ye hua ki mar gaye...
Tere bhi din guzar gaye mere bhi din guzar gaye.!

Tu bhi kuchh aur aur hai hum bhi kuchh aur aur hain...
Jaane wo tu kidhar gaya jaane wo hum kidhar gaye.!

Raahon mein hi mile the hum raahein naseeb ban gayin...
Wo bhi na apne ghar gaya hum bhi na apne ghar gaye.!

Waqt hi judaai ka itna taweel ho gaya...
Dil mein tere visaal ke jitne the zakhm bhar gaye.!

Hota raha muqaabla paani ka aur pyaas ka...
Sahra umad umad pade dariya biphar biphar gaye.!

Wo bhi ghubaar-e-khwaab tha hum bhi ghubar-e-khwab the...
Wo bhi kahin bikhar gaya hum bhi kahin bikhar gaye.!

Koi kanaar-e-aabjoo baitha hua hai sar-nigoon...
Kashti kidhar chali gai jaane kidhar bhanwar gaye.!

Aaj bhi intezaar ka waqt hunoot ho gaya...
Aisa laga ki hashr tak saare hi pal thehar gaye.!

Baarish-e-wasl wo hui saara ghubaar dhul gaya...
Wo bhi nikhar nikhar gaya hum bhi nikhar nikhar gaye.!

Aab-e-muheet-e-ishq ka bahr ajeeb bahr hai...
Taire to gharq ho gaye doobe to paar kar gaye.!

Itne qareeb ho gaye apne raqeeb ho gaye...
Wo bhi 'Adeem' darr gaya hum bhi 'Adeem' darr gaye.!

Us ke sulook par 'Adeem' apni hayaat-o-maut hai...
Wo jo mila to ji uthe wo na mila to mar gaye..!!

"Adeem Hashmi"
___
Kanaar-e-aabjoo = shore of rivulet, spring of water,
Sar-nigoo'n = vanquished,
Hunoot = mummify,
Aab-e-muheet-e-ishq = water of the ocean of love,