Chale Maqtal Ki Jaanib Aur Chhaati Khol Di Hum Ne

Chale maqtal ki jaanib aur chhaati khol di hum ne,
Badhaane par patang aaye to charkhi khol di hum ne..

Pada rahne do apne boriye par hum faqeeron ko,
Phati rah jaayengi aankhein jo mutthi khol di hum ne..

Kahaan tak bojh baisaakhi ka saari zindagi dhhote,
Utarte hi kun'ein mein aaj rassi khol di hum ne..

Farishto tum kahaan tak naama-e-a'amaal dekhoge,
Chalo ye nekiyaan gin lo ke gathhri khol di hum ne..

Tumhaara naam aaya aur hum takne lage rasta,
Tumhaari yaad aayi aur khidki khol di hum ne..

Pursane ho chale the zakhm saare aarzuon ke,
Kaho charaagaron se aaj patti khol di hum ne..

Tumhaare dukh uthhaye is liye phirte hain muddat se,
Tumhaare naam aayi thi jo chitthi khol di hum ne.!!

"Munawwar Rana"
____________________

چلے مقتل کی جانب اور چھاتی کھول دی ہم نے
بڑھانے پر پتنگ آئے تو چرخی کھول دی ہم نے..

پڑا رہنے دو اپنے بوریے پر ہم فقیروں کو
پھٹی رہ جائیں گی آنکھیں جو مٹھی کھول دی ہم نے..

کہاں تک بوجھ بیساکھی کا ساری زندگی ڈھوتے
اترتے ہی کنوئیں میں آج رسی کھول دی ہم نے..

فرشتو تم کہاں تک نامۂ اعمال دیکھو گے
چلو یہ نیکیاں گن لو کہ گٹھری کھول دی ہم نے..

تمہارا نام آیا اور ہم تکنے لگے رستہ
تمہاری یاد آئی اور کھڑکی کھول دی ہم نے..

پرانے ہو چلے تھے زخم سارے آرزوؤں کے
کہو چارہ گروں سے آج پٹی کھول دی ہم نے..

تمہارے دکھ اٹھائے اس لیے پھرتے ہیں مدت سے
تمہارے نام آئی تھی جو چٹھی کھول دی ہم نے..