Achchhi Surat Pe Ghazab Toot Ke Aana Dil Ka

Achchhi surat pe ghazab toot ke aana dil ka...
Yaad aata hai hamein haaye zamana dil ka...

Yum bhi munh choom lo be'saakhta pyaar aa jaaye...
Main sunaaun jo kabhi dil se fasana dil ka...

Nigaah-e-yaar ne ki khana-kharaabi aisi...
Na thhikana hai jigar ka na thhikana dil ka...

Poori mehndi bhi lagaani nahin aati ab tak...
Kyunkar aaya tujhe ghairon se lagana dil ka...

Ghuncha-e-gul ko wo mutthhi mein liye aate the...
Main ne poochha to kiya mujh se bahana dil ka...

In haseenon ka ladakpan hi rahe ya Allah...
Hosh aata hai to aata hai satana dil ka...

De khuda aur jagah sina o pahlu ke siwa...
Ke bure waqt mein ho jaaye thhikana dil ka...

Meri aaghosh se kya hi wo tadap kar nikle...
Un ka jaana tha ilaahi ke ye jaana dil ka...

Nigaah-e-sharm ko be'taab kiya kaam kiya...
Rang laya teri aaankhon mein samana dil ka...

Ungliyan taar-e-garebaan mein ulajh jati hain...
Sakht dushwaar hai haathon se dabana dil ka...

Hoor ki shakl ho tum noor ke putle ho tum...
Aur is par tumhein aata hai jalana dil ka...

Chhod kar us ko teri bazm se kyunkar jaaun...
Ek janaze ka uthhana hai uthhana dil ka...

Be'dili ka jo kaha haal to farmaate hain...
Kar liya tu ne kahin aur thhikana dil ka...

Naad muddat ke ye ai 'Dagh' samajh mein aaya...
Wahi daana hai kaha jis ne na mana dil ka.!!

"Dagh Dehlvi"
____________________

اچھی صورت پہ غضب ٹوٹ کے آنا دل کا
یاد آتا ہے ہمیں ہائے زمانا دل کا.. 

تم بھی منہ چوم لو بے ساختہ پیار آ جائے
میں سناؤں جو کبھی دل سے فسانا دل کا..

نگہ یار نے کی خانہ خرابی ایسی
نہ ٹھکانا ہے جگر کا نہ ٹھکانا دل کا..

پوری مہندی بھی لگانی نہیں آتی اب تک
کیوں کر آیا تجھے غیروں سے لگانا دل کا..

غنچۂ گل کو وہ مٹھی میں لیے آتے تھے
میں نے پوچھا تو کیا مجھ سے بہانا دل کا..

ان حسینوں کا لڑکپن ہی رہے یا اللہ
ہوش آتا ہے تو آتا ہے ستانا دل کا..

دے خدا اور جگہ سینہ و پہلو کے سوا
کہ برے وقت میں ہو جائے ٹھکانا دل کا..

میری آغوش سے کیا ہی وہ تڑپ کر نکلے
ان کا جانا تھا الٰہی کہ یہ جانا دل کا..

نگہ شرم کو بے تاب کیا کام کیا
رنگ لایا تری آنکھوں میں سمانا دل کا..

انگلیاں تار گریباں میں الجھ جاتی ہیں
سخت دشوار ہے ہاتھوں سے دبانا دل کا..

حور کی شکل ہو تم نور کے پتلے ہو تم
اور اس پر تمہیں آتا ہے جلانا دل کا..

چھوڑ کر اس کو تری بزم سے کیوں کر جاؤں
اک جنازے کا اٹھانا ہے اٹھانا دل کا..

بے دلی کا جو کہا حال تو فرماتے ہیں
کر لیا تو نے کہیں اور ٹھکانا دل کا..

بعد مدت کے یہ اے داغؔ سمجھ میں آیا
وہی دانا ہے کہا جس نے نہ مانا دل کا..