Ajab Apna Haal Hota Jo Wisaal-e-yaar Hota

Ajab apna haal hota jo wisaal-e-yaar hota,
Kabhi jaan sadqe hoti kabhi dil nisaar hota...

Koi fitna ta-qayamat na phir aashkaar hota,
Tere dil pe kaash zaalim mujhe ikhtiyaar hota...

Jo tumhaari tarah tum se koi jhoothe waade karta,
Tumhin munsifi se kah do tumhein e'tibaar hota...

Ghum-e-ishq mein maza tha jo use samajh ke khaate,
Ye wo zahar hai ki aakhir may-e-khush'gawaar hota...

Ye maza tha dil-lagi ka ki baraabar aag lagti,
Na tujhe qaraar hota na mujhe qaraar hota...

Na maza hai dushmani mein na hai lutf dosti mein,
Koi ghair ghair hota koi yaar yaar hota...

Tere waade par sitamgar abhi aur sabr karte,
Agar apni zindagi ka hamein e'tibaar hota...

Ye wo dard-e-dil nahin hai ke ho charasaaz koi,
Agar ek bar mit'ta to hazaar baar hota...

Gaye hosh tere zahid jo wo chashm-e-mast dekhi,
Mujhe kya ulat na dete jo na baada-khwaar hota...

Mujhe maante sab aisa ki adu bhi sajde karte,
Dar-e-yaar kaaba banta jo mera mazaar hota...

Tumhein naaz ho na kyunkar ke liya hai 'Dagh' ka dil
Ye raqam na haath lagti na ye iftikhaar hota.!!
"Dagh Dehlvi"
_____________

Aashkaar = clear, manifest, visible,
Munsifi = justice, equity, a munsif's court or office, decision.
Iftikhaar = honour, glory, distinction,
____________________

عجب اپنا حال ہوتا جو وصال یار ہوتا
کبھی جان صدقے ہوتی کبھی دل نثار ہوتا..

کوئی فتنہ تا قیامت نہ پھر آشکار ہوتا
ترے دل پہ کاش ظالم مجھے اختیار ہوتا..

جو تمہاری طرح تم سے کوئی جھوٹے وعدے کرتا
تمہیں منصفی سے کہہ دو تمہیں اعتبار ہوتا..

غم عشق میں مزا تھا جو اسے سمجھ کے کھاتے
یہ وہ زہر ہے کہ آخر مے خوش گوار ہوتا..

یہ مزہ تھا دل لگی کا کہ برابر آگ لگتی
نہ تجھے قرار ہوتا نہ مجھے قرار ہوتا..

نہ مزا ہے دشمنی میں نہ ہے لطف دوستی میں
کوئی غیر غیر ہوتا کوئی یار یار ہوتا..

ترے وعدے پر ستم گر ابھی اور صبر کرتے
اگر اپنی زندگی کا ہمیں اعتبار ہوتا..

یہ وہ درد دل نہیں ہے کہ ہو چارہ ساز کوئی
اگر ایک بار مٹتا تو ہزار بار ہوتا..

گئے ہوش تیرے زاہد جو وہ چشم مست دیکھی
مجھے کیا الٹ نہ دیتے جو نہ بادہ خوار ہوتا..

مجھے مانتے سب ایسا کہ عدو بھی سجدے کرتے
در یار کعبہ بنتا جو مرا مزار ہوتا..

تمہیں ناز ہو نہ کیونکر کہ لیا ہے داغؔ کا دل
یہ رقم نہ ہاتھ لگتی نہ یہ افتخار ہوتا..