Khuda Wo Waqt Na Laaye

Khuda Wo Waqt Na Laaye.....
K Sogwaar Ho Tu
Sukoo'n Ki Neend Tujhey Bhi Haraam Ho Jaaye,
Teri Masarrat-E-Paiham Tamaam Ho Jaaye,
Teri Hayaat Tujhey Talkh Jaam Ho Jaaye,
Ghumo'n Se Aaina-E-Dil Gudaaz Ho Tera,

Hujoom-E-Yaas Se Betaab Ho Ke Rah Jaaye,
Wafoor-E-Dard Se Seemaab Ho Ke Rah Jaaye,
Tera Shabaab Faqat Khwaab Ho Ke Rah Jaaye,
Ghuroor-E-Husn Saraapa Niyaaz Ho Tera,

Taweel Raato'n Mai Tu Bhi Qaraar Ko Tarsey,
Teri Nigaah Kisi Ghum-Gusaar Ko Tarsey,
Khizaa'n Raseeda Tamanna Bahaar Ko Tarsey,
Koi Zabee'n Na Terey Sang-E-Aastaa'n Pe Jhukey,

K Jins-E-Ajaz-O-Aqeedat Se Tujh Ko Shaad Karey,
Fareb-E-Waada-E-Farda Pe Aitmaad Karey,
Khuda Wo Waqt Na Laaye
K Tujh Ko Yaad Aaye
Wo Dil K Terey Liye Be-qaraar Ab Bhi Hai,
Wo Aankh Jis Ko Tera Intezaar Ab Bhi Hai..!!