Raqeeb Se

* Nazm *
__________

Aa Ke Wabasta Hain Us Husn Ki Yaadein Tujh Se,
Jis Ne Is Dil Ko Pari-Khana Bana Rakkha Tha...

Jis Ki Ulfat Mai Bhula Rakkhi Thi Duniya Hum Ne,
Dahar Ko Dahar Ka Afsaana Bana Rakkha Tha...

Aashna Hain Tere Qadmon Se Wo Raahein Jin Par,
Us Ki Madhosh Jawani Ne Inayat Ki Hai..

Kaarwaan Guzre Hain Jin Se Usi Raanaai Ke,
Jis Ki In Aankhon Ne Be-Sood Ibadat Ki Hai..

Tujh Se Kheli Hain Wo Mahboob Hawaaein Jin Mein,
Us Ke Malboos Ki Afsurda Mahak Baaqi Hai..

Tujh Pe Bhi Barsa Hai Us Baam Se Mahtaab Ka Noor,
Jis Mein Beeti Hui Raaton Ki Kasak Baaqi Hai..

Tu Ne Dekhi Hai Wo Peshaani, Wo Rukhsaar, Wo Honth,
Zindgi Jin Ke Tasawwur Mai Luta Di Hum Ne...

Tujh Pe Uthi Hai Wo Khoyi Hui Saahir Aankhein,
Tujh Ko Maloom Hai Kyun Umr Ganwa Di Hum Ne...

Hum Pe Mushtarka Hain Ahsaan Ghum-e-ulfat Ke,
Itne Ahsaan Ke Ginwaaun To Ginwa Na Sakun..

Hum Ne Is Ishq Mein Kya Khoya Hai Kya Seekha Hai,
Juz Tere Aur Ko Samjhaun To Samjha Na Sakun..

Aajzi Seekhi, Gareebon Ki Himaayat Seekhi,
Yaas-O-Harmaan Ke Dukh Dard Ke Maani Seekhe..

Zer-e-daston Ke Masaaib Ko Samajhna Seekha,
Sard Aahon Ke Rukh-e-zard Ke Maani Seekhe..

Jab Kabhi Baith Ke Rote Hain Wo Be-Kas Jin Ke,
Ashk Aankhon Mein Bilakte Hue So Jaate Hain..

Naatwaanon Ke Niwaalon Pe Jhapat te Hain Uqaab,
Baazu Taule Hue Mandlaate Hue Aate Hain..

Jab Kabhi Bikta Hai Bazaar Mai Mazdoor Ka Gosht,
Shah-raahon Pe Ghareebon Ka Lahu Bahta Hai..

Aag Si Seene Mein Rah Rah Ke Ubalti Hai Na Poochh,
Apney Dil Par Mujhe Qaabu Hi Nahi Rahta Hai.!!

"Faiz Ahmad Faiz"