Aankhon Se Door Subah Ke Taare Chale Gaye

Aankhon se door subah ke taare chale gaye,
Neend aa gayi to ghum ke nazare chale gaye..

Dil tha kisi ki yaad mein masroof aur hum,
Shishe mein zindagi ko utare chale gaye..

Allah re be-khudi ke hum un ke hi ru-ba-ru,
Be-ikhtiyaar unhi ko pukare chale gaye..

Mushkil tha kuchh to aish ki baazi ka jeetna,
Kuchh jeetne ke khauf se haare chale gaye..

Nakaami-e-hayat ka karte bhi kya gila,
Do din guzarna the guzare chale gaye..

Targheeb-e-tark-e-shauq ke parde mein ghum-gusaar,
Har naqsh-e-aarzu ko ubhaare chale gaye..

Pahunchai kis ne daawat-e-may ahl-e-zohd ko,
Shayad teri nazar ke ishaare chale gaye..

Wo dil hareef-e-jalwa-e-firdaus ban gaya,
Jis dil mein tere ghum ke sharare chale gaye..

Un ke baghair zeest ba-har-haal zeest thi,
Jaisi guzaarni thi guzaare chale gaye..

Jalwe kahaan jo zauq-e-tamasha nahin 'Shakeel',
Nazrein chali gayin to nazaare chale gaye.!!

"Shakeel Badayuni"
____________________

آنکھوں سے دور صبح کے تارے چلے گئے
نیند آ گئی تو غم کے نظارے چلے گئے..

دل تھا کسی کی یاد میں مصروف اور ہم
شیشے میں زندگی کو اتارے چلے گئے..

اللہ رے بے خودی کہ ہم ان کے ہی رو بہ رو
بے اختیار انہی کو پکارے چلے گئے..

مشکل تھا کچھ تو عیش کی بازی کا جیتنا
کچھ جیتنے کے خوف سے ہارے چلے گئے..

ناکامئ حیات کا کرتے بھی کیا گلہ
دو دن گزارنا تھے گزارے چلے گئے..

ترغیب ترک شوق کے پردے میں غم گسار
ہر نقش آرزو کو ابھارے چلے گئے.. 

پہنچائی کس نے دعوت مے اہل زہد کو
شاید تری نظر کے اشارے چلے گئے..

وہ دل حریف جلوۂ-فردوس بن گیا
جس دل میں تیرے غم کے شرارے چلے گئے..

ان کے بغیر زیست بہ ہر حال زیست تھی
جیسی گزارنی تھی گزارے چلے گئے..

جلوے کہاں جو ذوق تماشا نہیں شکیلؔ
نظریں چلی گئیں تو نظارے چلے گئے..