Judaai

* Nazm *
__________

Nigaar-e-shaam-e-ghum main tujh se rukhsat hone aaya hun...

Gale mil le ke yoon milne ki naubat phir na aayegi,

Sar-e-raah jo hum donon kahin mil bhi gaye to kya...

Ye lamhe phir na lautenge ye saa'at phir na aayegi,

Ke main ab sirf in guzre hue lamhon ka saaya hun...

Isi bazaar mein baarah baras hone ko aaye hain,

Ke main ne fastes ki tarah apni rooh bechi thi,

Masarrat ki musalsal gardish-e-yaksaa'n se ukta kar,

Tujhe haasil kiya tha aur har surat bhula di thi...

Purane saaz-o-samaan ab mujhe rone ko aaye hain...

Ghazab ki teergi hai raasta dekha nahin jaata,

Hawa ke shor mein dariya ki maujein badhti jaati hain...

Zameen se ukhde jaate hain darakhton ke qadam paiham,

Chattanein roop badle zer-e-lab kuchh padhti jaati hain,

Ab apni ungliyon ka faasla dekha nahin jaata...

Jaras ki naghmagi aawaz maatam hoti jaati hai,

Wahi mamool ke but hain wahi lamhon ki veerani,

Zara si der mein ye dhadkanein bhi doob jayengi,

Meri aankhon tak aa pahuncha hai ab bahta hua paani..

Teri aawaz maddham aur maddham hoti jaati hai.!!

"Mustafa Zaidi"