Idhar Dekh Lena Udhar Dekh Lena

Idhar dekh lena udhar dekh lena..
Kan-ankhiyon se us ko magar dekh lena,

Faqat nabz se haal zaahir na hoga..
Mera dil bhi ai chaaragar dekh lena,

Kabhi zikr-e-deedar aaya to bole..
Qayamat se bhi pesh-tar dekh lena,

Na dena khat-e-shauq ghabra ke pahle..
Mahal mauqa ai nama-bar dekh lena,

Kahin aise bigde sanwarte bhi dekhe..
Na aayenge wo raah par dekh lena,

Taghaful mein shokhi niraali ada thi..
Ghazab tha wo munh pher kar dekh lena,

Shab-e-waada apna yahi mashghala tha.. 
Utha kar nazar su-e-dar dekh lena,

Bulaya jo ghairo'n ko daawat mein tum ne..
Mujhe pesh-tar apne ghar dekh lena,

Mohabbat ke bazaar mein aur kya hai..
Koi dil dikhaye agar dekh lena,

Mere saamne ghair se bhi ishaare..
Idhar bhi udhar dekh kar dekh lena,

Na ho naazuk itna bhi mashshata koi..
Dahan dekh lena kamar dekh lena,

Nahin rakhne dete jahaan paanw hum ko.. 
Usi aastane pe sar dekh lena,

Tamasha-e-aalam ki fursat hai kis ko..
Ghanimat hai bas ek nazar dekh lena,

Diye jaate hain aaj kuchh likh ke tum ko..
Use waqt-e-fursat magar dekh lena,

Humin jaan denge humin mar mitenge..
Humein tum kisi waqt par dekh lena,

Jalaya to hai 'Dagh' ke dil ko tum ne..
Magar is ka hoga asar dekh lena.!

"Dagh Dehlvi"
_______________

ادھر دیکھ لینا ادھر دیکھ لینا
کن انکھیوں سے اس کو مگر دیکھ لینا..

فقط نبض سے حال ظاہر نہ ہوگا
مرا دل بھی اے چارہ گر دیکھ لینا..

کبھی ذکر دیدار آیا تو بولے
قیامت سے بھی پیشتر دیکھ لینا..

نہ دینا خط شوق گھبرا کے پہلے
محل موقع اے نامہ بر دیکھ لینا..

کہیں ایسے بگڑے سنورتے بھی دیکھے
نہ آئیں گے وہ راہ پر دیکھ لینا..

تغافل میں شوخی نرالی ادا تھی
غضب تھا وہ منہ پھیر کر دیکھ لینا..

شب وعدہ اپنا یہی مشغلہ تھا
اٹھا کر نظر سوئے در دیکھ لینا..

بلایا جو غیروں کو دعوت میں تم نے
مجھے پیشتر اپنے گھر دیکھ لینا..

محبت کے بازار میں اور کیا ہے
کوئی دل دکھائے اگر دیکھ لینا..

مرے سامنے غیر سے بھی اشارے
ادھر بھی ادھر دیکھ کر دیکھ لینا..

نہ ہو نازک اتنا بھی مشاطہ کوئی
دہن دیکھ لینا کمر دیکھ لینا..

نہیں رکھنے دیتے جہاں پاؤں ہم کو
اسی آستانے پہ سر دیکھ لینا..

تماشائے عالم کی فرصت ہے کس کو
غنیمت ہے بس اک نظر دیکھ لینا..

دیے جاتے ہیں آج کچھ لکھ کے تم کو
اسے وقت فرصت مگر دیکھ لینا..

ہمیں جان دیں گے ہمیں مر مٹیں گے
ہمیں تم کسی وقت پر دیکھ لینا..

جلایا تو ہے داغؔ کے دل کو تم نے
مگر اس کا ہوگا اثر دیکھ لینا..