Hosh Aate Hi Haseenon Ko Qayamat Aai

Hosh aate hi haseenon ko qayamat aai,
Aankh mein fitna-gari dil mein shararat aai..

Kya tasawwur hai nihayat mujhe hairat aai,
Aaine mein bhi nazar teri hi surat aai..

Is ada se dam-e-raftaar qayamat aai,
Aise hum kyun na hue un ko ye hasrat aai..

Roz-e-mahshar jo meri daad ki naubat aai,
Ye gayi wo gayi kab haath qayamat aai..

Ab isi par to hai takeed wafadaari ki,
Jab gaya jaan se main ghair ki shaamat aai..

Kah gaye taan se wo aa ke mere marqad par,
Sone waale tujhe kis tarah se raahat aai..

Ban sanwar kar jo wo aaye to ye main jaan gaya,
Ab gayi jaan gayi aai tabiyat aai..

Rakh diya munh pe mere haath shab-e-wasl us ne,
Be-hijaabi ke liye kaam shikayat aai..

Jab ye khaata hai mera khoon-e-jigar khaata hai,
Dil-e-beemar ko kis cheez pe raghbat aai..

Garche az-had hun gunahgaar musalman to hun,
Peechhe peechhe mere dozakh mein bhi jannat aai..

Main hua shefta un par wo adu par shaida,
Saath ke saath hi donon ki tabiyat aai..

Umr bhar us ko kaleje se lagaye rakha,
Tere beemar ko jis dard mein lazzat aai..

Hijr mein jaan nikalti nahin kya aafat hai,
Maar kar aaj ajal ko shab-e-furqat aai..

Apne deewanon ko dekha to kaha ghabra kar,
Ye nayi waz'a ki kis mulk se khilqat aai..

Jazb-e-dil kheench hi laaya unhein mere dar tak,
Paanw padti hui har-chand nazakat aai..

Yoon to paamaal hue saikdo'n mitne waale,
Pahle ginti mein jo aai meri turbat aai..

Hashr ka waada bhi karte nahin wo kahte hain,
Farz kar lo jo kayi bar qayamat aai..

'Dagh' ghabrao nahin ab koi dam ke dam mein,
Lo mubarak ho taraqqi ki bhi saa'at aai.!!

"Dagh Dehlvi"
_______________

Marqad = a grave, a tomb, sepulchre,
Raghbat = inclination, curiosity, wish, Interest,
Az-had = extreme, most, beyond limit,
Shefta = distracted with love, enamoured, mad,
Waz'a = manner/ state/ style,
Khilqat = creation, nature, people, the world,
____________________

ہوش آتے ہی حسینوں کو قیامت آئی
آنکھ میں فتنہ گری دل میں شرارت آئی..

کیا تصور ہے نہایت مجھے حیرت آئی
آئنے میں بھی نظر تیری ہی صورت آئی..

اس ادا سے دم رفتار قیامت آئی
ایسے ہم کیوں نہ ہوئے ان کو یہ حسرت آئی..

روز محشر جو مری داد کی نوبت آئی
یہ گئی وہ گئی کب ہاتھ قیامت آئی..

اب اسی پر تو ہے تاکید وفاداری کی
جب گیا جان سے میں غیر کی شامت آئی..

کہہ گئے طعن سے وہ آ کے مرے مرقد پر
سونے والے تجھے کس طرح سے راحت آئی.. 

بن سنور کر جو وہ آئے تو یہ میں جان گیا
اب گئی جان گئی آئی طبیعت آئی..

رکھ دیا منہ پہ مرے ہاتھ شب وصل اس نے
بے حجابی کے لیے کام شکایت آئی..

جب یہ کھاتا ہے مرا خون جگر کھاتا ہے
دل بیمار کو کس چیز پہ رغبت آئی..

گرچہ از حد ہوں گنہ گار مسلمان تو ہوں
پیچھے پیچھے مرے دوزح میں بھی جنت آئی..

میں ہوا شیفتہ ان پر وہ عدو پر شیدا
ساتھ کے ساتھ ہی دونوں کی طبیعت آئی.. 

عمر بھر اس کو کلیجے سے لگائے رکھا
تیرے بیمار کو جس درد میں لذت آئی.. 

ہجر میں جان نکلتی نہیں کیا آفت ہے
مار کر آج اجل کو شب فرقت آئی..

اپنے دیوانوں کو دیکھا تو کہا گھبرا کر
یہ نئی وضع کی کس ملک سے خلقت آئی.. 

جذب دل کھینچ ہی لایا انہیں میرے در تک
پاؤں پڑتی ہوئی ہرچند نزاکت آئی.. 

یوں تو پامال ہوئے سیکڑوں مٹنے والے
پہلے گنتی میں جو آئی مری تربت آئی..

حشر کا وعدہ بھی کرتے نہیں وہ کہتے ہیں
فرض کر لو جو کئی بار قیامت آئی..

داغؔ گھبراؤ نہیں اب کوئی دم کے دم میں
لو مبارک ہو ترقی کی بھی ساعت آئی..