Azaab-e-deed Mein Aankhein Lahu Lahu Kar Ke

Azaab-e-deed mein aankhein lahu lahu kar ke,
Main sharmsaar hua teri justuju kar ke...

Khandar ki tah se burida-badan saro'n ke siwa,
Mila na kuchh bhi khazaano'n ki aarzu kar ke...

Suna hai shahar mein zakhmi dilon ka mela hai,
Chalenge hum bhi magar pairahan rafu kar ke...

Masafat-e-shab-e-hijraa'n ke baad bhed khula,
Hawa dukhi hai charaghon ki aabru kar ke...

Zameen ki pyas usi ke lahu ko chaat gayi,
Wo khush hua tha samandar ko aabju kar ke...

Ye kis ne hum se lahu ka khiraaj phir maanga,
Abhi to soye the maqtal ko surkh-ru kar ke...

Juloos-e-ahl-e-wafa kis ke dar pe pahuncha hai,
Nishaan-e-tauq-e-wafa zeenat-e-gulu kar ke...

Ujaad rut ko gulaabi banaye rakhti hai,
Humari aankh teri deed se wuzu kar ke...

Koi to habs-e-hawa se ye poochhta 'Mohsin',
Mila hai kya use kaliyon ko be-numu kar ke.!!

"Mohsin Naqwi"
__________

Burida-badan = torn, bruised body,
Aabju = a stream, rivulet, brook,
Khiraaj = paying obeisance,
Nishaan-e-tauq-e-wafa = mark of neck-ring of constancy,
Habs-e-hawa = humidity,
Be-numu = without growth,