Ai Husn-e-yaar Sharm, Ye Kya Inqilaab Hai

Ai husn-e-yaar sharm, ye kya inqilaab hai,
Tujh se zyaada dard tera kaamyaab hai...

Aashiq ki be-dili ka taghaful nahin jawaab,
Us ka bas ek josh-e-mohabbat jawaab hai...

Teri inayatein ke nahin nazr-e-jaan qubool,
Teri nawazishein ke zamana kharaab hai... 

Ai husn apni hausla-afzaaiyan to dekh,
Maana ke chashm-e-shauq bahut be-hijaab hai...

Main ishq-e-be-niyaaz hun tum husn-e-be-panah,
Mera jawaab hai na tumhaara jawaab hai... 

May-khana hai usi ka ye duniya usi ki hai,
Jis tishna-lab ke haath mein jaam-e-sharaab hai...

Us se dil-e-tabah ki rudaad kya kahun,
Jo ye na sun sake ke zamana kharaab hai...

Ai mohtasib na phenk mere mohtasib na phenk,
Zaalim sharaab hai are zaalim sharaab hai...

Apne hudood se na badhe koi ishq mein,
Jo zarra jis jagah hai wahin aaftaab hai...

Wo laakh saamne hon magar is ka kya ilaaj,
Dil maanta nahin ke nazar kaamyaab hai...

Meri nigah-e-shauq bhi kuchh kam nahin magar,
Phir bhi tera shabaab tera hi shabaab hai...

Manoos-e-aitibaar-e-karam kyun kiya mujhe,
Ab har khata-e-shauq isi ka jawaab hai...

Main us ka aaina hun wo hai mera aaina,
Meri nazar se us ki nazar kaamyaab hai...

Tanhaai-e-firaaq ke qurbaan jaaiye,
Main hun khyaal-e-yaar hai chashm-e-pur-aab hai...

Sarmaya-e-firaaq 'Jigar' aah kuchh na poochh,
Ab jaan hai so apne liye khud azaab hai.!!

"Jigar Muradabadi"

اے حسن یار شرم یہ کیا انقلاب ہے
تجھ سے زیادہ درد ترا کامیاب ہے

عاشق کی بے دلی کا تغافل نہیں جواب
اس کا بس ایک جوش محبت جواب ہے

تیری عنایتیں کہ نہیں نذر جاں قبول
تیری نوازشیں کہ زمانہ خراب ہے

اے حسن اپنی حوصلہ افزائیاں تو دیکھ
مانا کہ چشم شوق بہت بے حجاب ہے

میں عشق بے نیاز ہوں تم حسن بے پناہ
میرا جواب ہے نہ تمہارا جواب ہے

مے خانہ ہے اسی کا یہ دنیا اسی کی ہے
جس تشنہ لب کے ہاتھ میں جام شراب ہے

اس سے دل تباہ کی روداد کیا کہوں
جو یہ نہ سن سکے کہ زمانہ خراب ہے

اے محتسب نہ پھینک مرے محتسب نہ پھینک
ظالم شراب ہے ارے ظالم شراب ہے

اپنے حدود سے نہ بڑھے کوئی عشق میں
جو ذرہ جس جگہ ہے وہیں آفتاب ہے

وہ لاکھ سامنے ہوں مگر اس کا کیا علاج
دل مانتا نہیں کہ نظر کامیاب ہے

میری نگاہ شوق بھی کچھ کم نہیں مگر
پھر بھی ترا شباب ترا ہی شباب ہے

مانوس اعتبار کرم کیوں کیا مجھے
اب ہر خطائے شوق اسی کا جواب ہے

میں اس کا آئینہ ہوں وہ ہے میرا آئینہ
میری نظر سے اس کی نظر کامیاب ہے

تنہائی فراق کے قربان جائیے
میں ہوں خیال یار ہے چشم پر آب ہے

سرمایۂ فراق جگرؔ آہ کچھ نہ پوچھ
اب جان ہے سو اپنے لیے خود عذاب ہے..