Zarre Hi Sahi Koh Se Takra To Gaye Hum

Zarre hi sahi koh se takra to gaye hum,
Dil le ke sar-e-arsa-e-ghum aa to gaye hum..

Ab naam rahe ya na rahe ishq mein apna,
Rudaad-e-wafa daar pe dohra to gaye hum..

Kahte the jo ab koi nahin jaan se guzarta,
Lo jaan se guzar kar unhen jhutla to gaye hum..

Jaan apni ganwa kar kabhi ghar apna jala kar,
Dil un ka har ek taur se bahla to gaye hum..

Kuchh aur hi aalam tha pas-e-chehra-e-yaraa'n,
Rahta jo yunhi raaz use pa to gaye hum.. 

Ab soch rahe hain ke ye mumkin hi nahin hai,
Phir un se na milne ki qasam kha to gaye hum..

Utthen ke na utthen ye raza un ki hai 'Jalib',
Logon ko sar-e-daar nazar aa to gaye hum.!!

"Habeeb Jalib"