Ye Aur Baat Teri Gali Mein Na Aayen Hum

Ye aur baat teri gali mein na aayen hum, 
Lekin ye kya ke shahar tera chhorh jaayen hum..

Muddat hui hai ku-e-butaa'n ki taraf gaye, 
Aawaargi se dil ko kahaan tak bachayen hum..

Shayad ba-qaid-e-zeest ye saa'at na aa sake,
Tum dastaan-e-shauq suno aur sunayen hum..

Be-noor ho chuki hai bahut shahar ki faza,
Tareek raaston mein kahin kho na jaayen hum..

Us ke baghair aaj bahut ji udaas hai,
'Jalib' chalo kahin se use dhundh laayen hum.!!

"Habeeb Jalib"
__________

Ba-qaid-e-zeest = alive, with imprisonment for life,