Yaad Use Intihaai Karte Hain

Yaad use intihaai karte hain,
So hum us ki buraai karte hain..

Pasand aata hai dil se yusuf ko,
Wo jo yusuf ke bhai karte hain..

Hai badan khwab-e-wasl ka dangal,
Aao zor-azmaai karte hain..

Us ko aur ghair ko khabar hi nahin,
Hum lagaai bujhaai karte hain..

Hum ajab hain ke us ki baanhon mein,
Shikwa-e-narasaai karte hain..

Haalat-e-wasl mein bhi hum dono'n,
Lamha lamha judaai karte hain..

Aap jo meri jaan hain main dil hun,
Mujh se kaise judaai karte hain..

Ba-wafa ek dusre se miyaan,
Har-nafas bewafaai karte hain..

Jo hain sarhad ke paar se aaye,
Wo bahut khud-sataai karte hain..

Pal qayamat ke sood-khwaar hain 'Jaun',
Ye abad ki kamaai karte hain.!!

"Jaun Eliya"