Us Shaam Wo Rukhsat Ka Samaa'n Yaad Rahega

Us shaam wo rukhsat ka samaa'n yaad rahega,
Wo shahar wo koocha wo makaa'n yaad rahega...

Wo tees ke ubhri thi idhar yaad rahegi,
Wo dard ke uttha tha yahaan yaad rahega...

Hum shauq ke shole ki lapak bhool bhi jaayen,
Wo shaam-e-fasurda ka dhuaan yaad rahega...

Haan bazm-e-shabana mein hama-shauq jo us din,
Hum the teri jaanib nigraa'n yaad rahega... 

Kuchh 'Meer' ke abyaat the kuchh 'Faiz' ke misre,
Ek dard ka tha jin mein bayaa'n yaad rahega...

Aankhon mein sulagti hui wahshat ke jilau mein,
Wo hairat o hasrat ka jahaan yaad rahega...

Jaan-bakhsh si us barg-e-gul-e-tar ki taraawat,
Wo lams-e-azeez-e-do-jahaan yaad rahega...

Hum bhool sake hain na tujhe bhool sakenge,
Tu yaad rahega humein haan yaad rahega.!!

"Ibn E Insha"