Roz raushan rahein haalaat zaroori to nahin,
Chandni raat ho har raat zaroori to nahin..
Barq gir jaaye agar ghar bhi jala sakti hai,
Us ke pahlu mein ho barsaat zaroori to nahin..
Daaman-e-ishq mein rakhshaa'n hain hazaron khushiyan,
Ghum hi ho ishq ki saughaat zaroori to nahin..
Mast aankhon se bhi hum pyaas bujha sakte hain,
Bakhshish-e-meer-e-kharabaat zaroori to nahin..
Hum ko rona hai to ro lenge kahin bhi ja kar,
Husn ki bazm-e-tilismaat zaroori to nahin..
Un ki yaadon se takhayyul ko sajaye rakhiye,
Ho kabhi un se mulaqaat zaroori to nahin..
Din badalte hain to rishte bhi badal jaate hain,
Umr bhar un ki inayaat zaroori to nahin..
Ai 'Shafaq' aap hi kuchh surat-e-izhaar karein,
Un ki jaanib se chale baat zaroori to nahin.!!
"Gopal Krishna Shafaq"
No comments:
Post a Comment