Phir dil se aa rahi hai sada us gali mein chal,
Shayad mile ghazal ka pata us gali mein chal..
Kab se nahin hua hai koi sheyr kaam ka,
Ye sheyr ki nahin hai faza us gali mein chal..
Wo baam o dar wo log wo ruswaaiyon ke zakhm,
Hain sab ke sab azeez juda us gali mein chal..
Us phool ke baghair bahut ji udaas hai,
Mujh ko bhi saath le ke saba us gali mein chal..
Duniya to chahti hai yunhi faasle rahein,
Duniya ke mashwaron pe na ja us gali mein chal..
Be-noor o be-asar hai yahaan ki sada-e-saaz,
Tha us sukoot mein bhi maza us gali mein chal..
'Jalib' pukaarti hain wo shola-nawaaiyan,
Ye sard rut ye sard hawa us gali mein chal.!!
"Habeeb Jalib"
No comments:
Post a Comment