Mata-e-ghair

* Nazm *
__________

Aakhir-kaar ye saa'at bhi qareeb aa pahunchi..
Tu meri jaan kisi aur ki ho jaayegi,

Kal talak mera muqaddar thi teri zulf ki shaam..
Kya taghayyur hai ke tu ghair ki kahlayegi,

Mere ghum-khaane mein tu ab na kabhi aayegi..

Teri sahmi hui masum nigahon ki zabaan,
Meri mahboob koi ajnabi kya samjhega..

Kuchh jo samjha bhi to is ain-khushi ke hangaam,
Teri khamosh nigaahi ko haya samjhega..

Tere bahte hue ashkon ko ada samjhega..

Meri dam-saaz zamane se chali aati hain,
Rehn-e-ghum waqf-e-alam saada-dilon ki aankhein,

Ye naya zulm nahin pyaar ke matwaalon par,
Hum ne dekhin yunhi nam saada-dilon ki aankhein,

Aur ro lein koi dam saada-dilon ki aankhein.!!

"Habeeb Jalib"