Main bhi aage badhun aur bheed ka hissa ho jaaun,
Is se achchha to yahi hai ke main tanha ho jaaun..
Pyas ko meri jo ek jaam na de paaya kabhi,
Tishnagi us ki ye kahti hai main dariya ho jaaun..
Mujh ko jakde hue rishton ki haqeeqat mat poochh..
Bas chale mera agar to main akela ho jaaun..
Le ke jaaun kahaan ahsas-e-wafadaari ko,
Dil to kahta hai ke main bhi tere jaisa ho jaaun..
Ho kisi taur to duniya ki tawajjoh mujh par,
Ek do pal ke liye main bhi tamasha ho jaaun..
Dil ki majboori ajab cheez hai warna 'Jawed',
Kaun chahega bhala khud ke main ruswa ho jaaun.!!
"Jawed Naseemi"
No comments:
Post a Comment