Kisi ke ru-ba-ru baitha raha main be-zabaan ho kar,
Meri aankhon se hasrat phoot nikli dastaan ho kar..
Khuda-haafiz kisi ke raaz-e-ulfat ka khuda-haafiz,
Khyaal aate hi ab to dil dhadakta hai fughaa'n ho kar..
Piya aab-e-baqa ai khizr ab taseer bhi dekho,
Qayamat tak raho paaband umr-e-jawedaa'n ho kar..
Yakayak wo mareez-e-ghum ki surat ka badal jaana,
Wo ro dena kisi na-mehrbaan ka mehrbaan ho kar..
Kitaab-e-dahr ka dilchasp tukda hai meri hasti,
Mujhe dekho ke baitha hun mujassam dastaan ho kar..
Suna hai is taraf se bhi janaab-e-ishq guzrenge,
Meri hasti na ud jaaye ghubaar-e-karwaan ho kar.!!
"Hafeez Jalandhari"
No comments:
Post a Comment