Kal Chaudhwin Ki Raat Thi Shab Bhar Raha Charcha Tera

Kal chaudhwin ki raat thi shab bhar raha charcha tera,
Kuchh ne kaha ye chaand hai kuchh ne kaha chehra tera..

Hum bhi wahin maujood the hum se bhi sab poochha kiye,
Hum hans diye hum chup rahe manzoor tha parda tera..

Is shahar mein kis se milein hum se to chhootin mahfilein,
Har shakhs tera naam le har shakhs deewana tera..

Kooche ko tere chhorh kar jogi hi ban jaayen magar,
Jangal tere parbat tere basti teri sahra tera..

Hum aur rasm-e-bandagi aashuftagi uftaadgi,
Ahsaan hai kya kya tera ai husn-e-be-parwa tera..

Do ashk jaane kis liye palkon pe aa kar tik gaye,
Altaaf ki baarish teri ikraam ka dariya tera..

Ai be-daregh o be-amaa'n hum ne kabhi ki hai fughaa'n,
Hum ko teri wahshat sahi hum ko sahi sauda tera..

Hum par ye sakhti ki nazar hum hain faqeer-e-rahguzar,
Rasta kabhi roka tera daaman kabhi thaama tera..

Haan haan teri surat haseen lekin tu aisa bhi nahin,
Ek shakhs ke ash'aar se shohra hua kya kya tera..

Bedard sunni ho to chal kahta hai kya achchhi ghazal,
Aashiq tera ruswa tera shaair tera 'Insha' tera.!!

"Ibn E Insha"
__________

Aashuftagi = distress/ affliction,
Uftaadgi = accidental, distressed, difficult, helplessness, misery,
Be-daregh = readily, rashly, without regret or hesitation,