Dil Par Jo Zakhm Hain Wo Dikhayen Kisi Ko Kya

Dil par jo zakhm hain wo dikhayen kisi ko kya,
Apna shareek-e-dard banayen kisi ko kya..

Har shakhs apne apne ghumo'n mein hai mubtala,
Zindaan mein apne saath rulayen kisi ko kya..

Bichhde hue wo yaar wo chhode hue dayaar,
Rah rah ke hum ko yaad jo aayen kisi ko kya..

Rone ko apne haal pe tanhaai hai bahut,
Us anjuman mein khud pe hansayen kisi ko kya..

Wo baat chhed jis mein jhalakta ho sab ka ghum,
Yaadein kisi ki tujh ko satayen kisi ko kya..

Soye hue hain log to honge sukoon se,
Hum jaagne ka rog lagayen kisi ko kya..

'Jalib' na aayega koi ahwaal poochhne,
Dein shahar-e-be-hisaa'n mein sadayen kisi ko kya.!!

"Habeeb Jalib"
__________

Shahar-e-be-hisaa'n = city of the insensitive,