*** Qitaa ***

(1)
Charasaazo'n ki chaara-saazi se,
Dard badnaam to nahin hoga..

Haan dawa do magar ye batla do,
Mujh ko aaraam to nahin hoga.!!

"Jaun Eliya"
_______________

(2)
Chaand ki pighli hui chaandi mein,
Aao kuchh rang-e-sukhan gholenge..

Tum nahin bolti ho mat bolo,
Hum bhi ab tum se nahin bolenge.!!

"Jaun Eliya"
_______________

(3)
Hai mohabbat hayat ki lazzat,
Warna kuchh lazzat-e-hayat nahin..

Kya ijaazat hai ek baat kahun,
Wo magar khair koi baat nahin.!!

"Jaun Eliya"
_______________

(4)
Har tanz kiya jaate har ek tana diya jaaye,
Kuchh bhi ho par ab hadd-e-adab mein na raha jaaye..

Tareekh ne qaumo'n ko diya hai yahi paighaam,
Haq maangna tauheen hai haq chheen liya jaaye.!!

"Jaun Eliya"
_______________

(5)
Jo haqeeqat hai us haqeeqat se,
Door mat jao laut bhi aao..

Ho gayin phir kisi khyaal mein gum,
Tum meri aadatein na apnao.!!

"Jaun Eliya"
_______________

(6)
Jo raanaai nigahon ke liye firdaus-e-jalwa hai,
Libaas-e-muflisi mein kitni be-qeemat nazar aati..

Yahaan to jazbiyat bhi hai daulat hi ki parwarda,
Ye ladki faaqa-kash hoti to bad-surat nazar aati.!!

"Jaun Eliya"
_______________

(7)
Kaun sood-o-ziyaa'n ki duniya mein,
Dard ghurbat ka saath deta hai..

Jab muqaabil hon ishq aur daulat,
Husn daulat ka saath deta hai.!!

"Jaun Eliya"
_______________

(8)
Kya bataaun ke sah raha hun main,
Karb khud apni bewafaai ka..

Kya main is ko teri talaash kahun?
Dil mein ek shauq hai judaai ka.!!

"Jaun Eliya"
_______________

(9)
Main ne har baar tujh se milte waqt,
Tujh se milne ki aarzu ki hai..

Tere jaane ke baad bhi main ne,
Teri khushbu se guftugu ki hai.!!

"Jaun Eliya"
_______________

(10)
Meri jab bhi nazar padti hai tujh par,
Meri gulfaam jaan-e-dilrubaai,

Mere ji mein ye aata hai ke mal dun,
Tere gaalo'n pe neeli raushnaai.!!

"Jaun Eliya"
_______________

(11)
Sharm dahshat jhijhak pareshani,
Naaz se kaam kyun nahin letin..

Aap wo ji magar ye sab kya hai,
Tum mera naam kyun nahin letin.!!

"Jaun Eliya"
_______________

(12)
Thi jo wo ek tamseel-e-maazi aakhiri manzar us ka ye tha,
Pahle ek saaya sa nikal ke ghar se baahar aata hai..

Is ke baad kayi saaye se us ko rukhsat karte hain,
Phir deewarein dhhe jaati hain darwaza gir jaata hai.!!

"Jaun Eliya"
_______________

(13)
Us ke aur apne darmiyan mein ab,
Kya hai bas ru-ba-ru ka rishta hai..

Haye wo rishta-ha-e-khamoshi,
Ab faqat guftugu ka rishta hai.!!

"Jaun Eliya"
_______________

(14)
Ye tere khat teri khushbu ye tere khwab-o-khyaal,
Mata-e-jaan hain tere qaul aur qasam ki tarah..

Guzashta saal inhein main ne gin ke rakkha tha,
Kisi ghareeb ki jodi hui raqam ki tarah.!!

"Jaun Eliya"