Chalo Baad-e-bahaari Ja Rahi Hai

Chalo baad-e-bahaari ja rahi hai,
Piya-ji ki sawaari ja rahi hai..

Shumaal-e-jawedaa'n-e-sabz-e-jaan se,
Tamanna ki amaari ja rahi hai..

Fughaa'n ai dushman-e-daar-e-dil-o-jaan,
Meri haalat sudhaari ja rahi hai..

Jo in rozo'n mera ghum hai wo ye hai,
Ke ghum se burdbaari ja rahi hai..

Hai seene mein ajab ek hashr barpa,
Ke dil se be-qaraari ja rahi hai..

Main paiham haar kar ye sochta hun,
Wo kya shay hai jo haari ja rahi hai..

Dil us ke ru-ba-ru hai aur gum-sum,
Koi arzi guzaari ja rahi hai..

Wo sayyad bachcha ho aur shaikh ke saath,
Miyaan izzat humari ja rahi hai..

Hai barpa har gali mein shor-e-naghma,
Meri fariyaad maari ja rahi hai..

Wo yaad ab ho rahi hai dil se rukhsat,
Miyaan pyaron ki pyarai ja rahi hai..

Daregha teri nazdeeki miyaan-jaan,
Teri doori pe waari ja rahi hai..

Bahut bad-haal hain basti tere log,
To phir tu kyun sanwaari ja rahi hai..

Teri marham-nigaahi ai masiha,
Kharaash-e-dil pe waari rahi hai..

Kharaabe mein ajab tha shor barpa,
Dilo'n se intizaari ja rahi hai.!!

"Jaun Eliya"
__________

Shumaal-e-jawedaa'n-e-sabz-e-jaan = north of life's evergreen eternity,
Amaari = rider's seat with a canopy on an elephant or camel, saddle,
Burdbaari = maturity; sagacity; understanding,
Paiham = continuous,
Miyaan-jaan = a form of polite address,