Badi Mushkil Se Chhupaya Hai Koi Dekh Na Le

Badi mushkil se chhupaya hai koi dekh na le,
Aankh mein ashk jo aaya hai koi dekh na le..

Ye jo mahfil mein mere naam se maujood hun main,
Main nahin hun mera dhokha hai koi dekh na le..

Saat pardon mein chhupa kar use rakkha hai magar,
Dil ko ab bhi yahi dhadka hai koi dekh na le..

Darr raha hun ke sar-e-shaam teri aankhon mein,
Main ne jo waqt guzara hai koi dekh na le..

Hath narmi se chhudaati hui khalwat ne kaha,
Ye jo khalwat hai tamasha hai koi dekh na le..

Tera mera koi rishta to nahin hai lekin,
Main ne jo khwab mein dekha hai koi dekh na le..

Saath chalna hai to ghairon ki tarah saath na chal,
Shahr ka shahr shanasa hai koi dekh na le.!!

"Jawed Saba"