Aisi Jagah Le Chal

* Nazm *
__________

Dil-e-majboor tu mujh ko kisi aisi jagah le chal,
Jahaan mahboob mahbooba se aazadana milta ho..

Kisi ka narm-o-naazuk haath apne haath mein le kar,
Nikal sakta ho be-khatke koi sair-e-gulistaan ko..

Nigaahon ke jahaan pahre na hon dil ke dhadakne par,
Jahaan chhini na jaati ho khushi ahl-e-mohabbat ki..

Jahaan armaan bhare dil khoon ke aansu na rote hon,
Jahaan rondi na jaati ho khushi ahl-e-mohabbat ki..

Jahaan jazbaat ahl-e-dil ke thukraye na jaate hon,
Jahaan baaghi na kahta ho koi khuddaar insaan ko..

Jahaan barsaye jaate hon na koode zehn-e-insaan par,
Khyaalon ko jahaan zanjir pahnaai na jaati ho..

Kahaan tak ai dil-e-nadaan qayaam aise gulistaan mein,
Jahaan bahta ho khoin-e-garm-e-insaan shah-raahon par,

Darindon ki jahaan chaandi ho zaalim dandanaate hon,
Jhapat padte hon shaahi'n jis jagah kamzor chidiyon par..

Dil-e-majboor tu mujh ko kisi aisi jagah le chal,
Jahaan mahboob mahbooba se aazadana milta ho.!!

"Rajendra Nath Rahbar"
__________

Aazadana = freely, independently,
Shah-raahon = highways,
Shaahi'n = eagle,