Aaj Barso'n Mein To Qismat Se Mulaqaat Hui

Aaj barso'n mein to qismat se mulaqaat hui,
Aap munh pher ke baithe hain ye kya baat hui..

Ud gayi khaak-e-dil-o-jaan to wo rone baithe,
Bastiyan jal gayin jab toot ke barsaat hui..

Tum mere saath the jab tak to safar raushan tha,
Shama jis mod pe chhooti hai wahin raat hui..

Is mohabbat se mila hai wo sitamgar hum se,
Jitne shikwe na hue utni mudaraat hui.. 

Ek lamha tha ajab us ki shanasaai ka,
Kitne nadeeda zamano'n se mulaqaat hui.. 

Qatl ho jaati hai is daur mein dil ki aawaz,
Mujh pe talwaar na tooti ye karamaat hui.. 

Gaanw ke gaanw bujhane ko hawa aai thi,
Mere masoom charaaghon se shuruaat hui..

Shayeri pahle rasoolo'n ki dua thi 'Qaisar', 
Aaj is ahd mein ek shoabda-e-zaat hui.!!

"Qaisar-ul-jafri"
__________

Shoabda-e-zaat = jugglery of self,