Aaina Saamne Rakhoge To Yaad Aaunga

Aaina saamne rakhoge to yaad aaunga,
Apni zulfo'n ko sanwaroge to yaad aaunga..

Rang kaisa ho ye sochoge to yaad aaunga,
Jab naya suit kharidoge to yaad aaunga..

Bhool jaana mujhe aasaan nahin hai itna, 
Jab mujhe bhoolna chaahoge to yaad aaunga..

Dhyaan jayega bahar-haal meri hi jaanib,
Tum jo puja mein bhi baithoge to yaad aaunga..

Ek din bheege the barsaat mein hum tum dono'n,
Ab jo barsaat mein bheegoge to yaad aaunga..

Chaandni raat mein phoolon ki suhani rut mein,
Jab kabhi sair ko nikaloge to yaad aaunga..

Jin mein mil jaate the hum tum kabhi aate jaate,
Jab bhi un galiyon se guzroge to yaad aaunga..

Yaad aaunga udaasi ki jo rut aayegi,
Jab koi jashn manaoge to yaad aaunga..

Shelf mein rakkhi hui apni kitaabon mein se,
Koi deewan uthaoge to yaad aaunga.. 

Shama ki lau pe sar-e-shaam sulagte jalte,
Kisi parwane ko dekhoge to yaad aaunga..

Jab kisi phool pe ghash hoti hui bulbul ko,
Sehn-e-gulzaar mein dekhoge to yaad aaunga.!!

"Rajendra Nath Rahbar"