Teri Khushbu Ka Pata Karti Hai

Teri Khushbu Ka Pata Karti Hai,
Mujh Pe Ahsaan Hawa Karti Hai..

Shab Ki Tanhaai Main Ab To Aksar,
Guftagu Tujh Se Raha Karti Hai..

Dil Ko Us Raah Pe Chalna Hi Nahi,
Jo Mujhey Tujh Se Juda Karti Hai..

Zindagi Meri Thi Lekin Ab To,
Terey Kahney Main Raha Karti Hai..

Us Ne Dekha Hi Nahi Warna Ye Aankh,
Dil Ka Ahwaal Kaha Karti Hai..

Beniyaz-e-kaf-e-dariya Angusht,
Ret Par Naam Likha Karti Hai..

Shaam Padtey Hi Kisi Shakhs Ki Yaad,
Koocha-e-Jaan Main Sada Karti Hai..

Mujh Se Bhi Us Ka Hai Waisa Hi Sulook,
Haal Jo Tera....... Ana Karti Hai..

Dukh Hua Karta Hai Kuch Aur Bayaan,
Baat Kuch Aur Hua Karti Hai..

Abr Barsey To Inaayat Us Ki,
Shaakh To Sirf Duaa Karti Hai..

Masl'ala Jab Bhi Utha Charagon Ka,
Faisala Sirf Hawa Karti Hai..!!

- Parween Shakir