Shab-e-hijraa'n Thi Jo Basar Na Hui

Shab-e-hijraa'n Thi Jo Basar Na Hui,
Warna Kis Raat Ki Sahar Na Hui..

Aisa Kya Jurm Ho Gaya Hum Se,
Kyun Mulaqaat Umr Bhar Na Hui..

Ashk Palkon Pe Mustaqil Chamke,
Kabhi Tahni Ye Be-samar Na Hui..

Teri Qurbat Ki Raushni Ki Qasam,
Subah Aai, Magar Sahar Na Hui..

Hum Ne Kya Kya Na Kar Ke Dekh Liya,
Koi Tadbeer Kaar-gar Na Hui..

Kitne Suraj Nikal Ke Doob Gaye,
Shaam-e-hijraa'n Teri Sahar Na Hui..

Un Se Mahfil Rahi Hai Roz-o-shab,
Dosti Un Se Umr Bhar Na Hui..

Ye Rah-e-rozgaar Bhi Kya Hai, 
Aise Bichhade Ke Phir Khabar Na Hui..

Is Qadar Dhoop Thi Judaai Ki, 
Yaad Bhi Saaya-e-shajar Na Hui..

Shab-e-hijraa'n Hi Kat Saki Na "Adeem",
Warna Kis Raat Ki Sahar Na Hui..!!

"Adeem Hashmi"

شبِ ہجراں تھی جو بسَر نہ ہُوئی
ورنہ کِس رات کی سَحر نہ ہوئی..

ایسا کیا جُرم ہوگیا ہم سے
کیوں مُلاقات عُمر بھر نہ ہُوئی..

اشک پلکوں پہ مُستقل چمکے
کبھی ٹہنی یہ بے ثمر نہ ہُوئی..

تیری قُربت کی روشنی کی قسم
صُبح آئی، مگر سَحر نہ ہُوئی..

ہم نے کیا کیا نہ کر کے دیکھ لِیا
کوئی تدبِیر کار گر نہ ہُوئی..

کتنے سُورج نِکل کے ڈُوب گئے
شامِ ہجراں! تِری سَحر نہ ہوئی..

اُن سے محفِل رہی ہے روز و شب
دوستی اُن سے عُمر بھر نہ ہُوئی..

یہ رَہِ روزگار بھی کیا ہے
ایسے بچھڑے، کہ پھر خبر نہ ہُوئی..

اِس قدر دُھوپ تھی جُدائی کی
یاد بھی سایۂ شجر نہ ہُوئی..

شبِ ہجراں ہی کٹ سکی نہ عدیم
ورنہ کِس رات کی سَحر نہ ہوئی..

"عدیم ہاشمی"