Ranj-o-ghum Maange Hai Andoh-o-bala Maange Hai

Ranj-o-ghum maange hai andoh-o-bala maange hai,
Dil wo mujrim hai ke khud apni saza maange hai,

Chup hai har zakhm-e-gulu chup hai shaheedon ka lahu,
Dast-e-qaatil hai jo mehnat ka sila maange hai,

Tu bhi ek daulat-e-nayaab hai par kya kahiye,
Zindagi aur bhi kuchh tere siwa maange hai,

Khoi khoi ye nigaahein ye khamida palkein,
Haath uthaye koi jis tarah dua maange hai,

Raas ab aayegi ashkon ki na aahon ki faza,
Aaj ka pyaar nayi aab-o-hawa maange hai,

Baansuri ka koi naghma na sahi cheekh sahi,
Har sukoot-e-shab-e-ghum koi sada maange hai,

Laakh munkir sahi par zauq-e-parastish mera,
Aaj bhi koi sanam koi khuda maange hai, 

Saans waise hi zamane ki ruki jaati hai,
Wo badan aur bhi kuchh tang qaba maange hai,

Dil har ek haal se begana hua jaata hai,
Ab tawajjoh na taghaful na ada maange hai.!!

"Jaan Nisaar Akhtar"
__________

Andoh-o-bala = anxiety; grief; anguish and calamity or affliction; evil spirit,
Zakhm-e-gulu = wound in throat,
Khamida = bent,