Patthar Ke Jigar Waalo Ghum Mein Wo Rawaani Hai

Patthar ke jigar waalo ghum mein wo rawaani hai,
Khud raah bana lega bahta hua paani hai,

Ek zehn-e-pareshaan mein khwaab-e-ghazalistan hai,
Patthar ki hifaazat mein sheeshe ki jawaani hai,

Dil se jo chhate baadal to aankh mein saawan hai,
Thehra hua dariya hai bahta hua paani hai,

Hum-rang-e-dil-e-pur-khoo'n har laala-e-sahraai,
Gesu ki tarah muztar ab raat ki raani hai,

Jis sang pe nazrein kin khurshid-e-haqeeqat hai,
Jis chaand se munh moda patthar ki kahaani hai,

Ai peer-e-khirad-mandaa'n dil ki bhi zaroorat hai,
Ye shahr-e-ghazaala'n hai ye mulk-e-jawaani hai,

Ghum wajah-e-figaar-e-dil ghum wajah-e-qaraar-e-dil,
Aansu kabhi sheesha hai aansu kabhi paani hai,

Is hausla-e-dil par hum ne bhi kafan pahna,
Hans kar koi poochhega kya jaan ganwaani hai,

Din talkh haqaa'iq ke sahraaon ka suraj hai,
Shab gesu-e-afsaana yaadon ki kahaani hai,

Wo husn jise hum ne ruswa kiya duniya mein,
Na-deeda haqeeqat hai na-gufta kahaani hai,

Wo misra-e-awaara deewanon pe bhaari hai,
Jis mein tere gesu ki be-rabt kahaani hai,

Hum khushbu-e-awaara hum noor-e-pareshaan hain,
Ai "Badr" muqaddar mein aashufta-bayaani hai.!!

"Basheer Badr"
___
Khwaab-e-ghazalistan = dream of world of poems,
Hum-rang-e-dil-e-pur-khoo'n = of the same colour as bloody heart,
Laala-e-sahraai = tulip, red poppy flower of desert, metaphor for heart or eye,
Muztar = distressed, agitated, restless,
Peer-e-khirad-mandaa'n = master of rational,
Shahr-e-ghazaala'n = city of deer, beautiful girls with eyes like deer,
Wajah-e-figaar-e-dil = reason for broken heart,
Wajah-e-qaraar-e-dil = reason for peace in heart,
Haqaa'iq = facts, realities,
Gesu-e-afsaana = tresses of story,
Na-deeda = unseen,
Na-gufta = unsaid, untold,
Aashufta-bayaani = distressed speech,