Mujh Ko Shikastagi Ka Qalaq Der Tak Raha

Mujh ko shikastagi ka qalaq der tak raha,
Kyun chehra phir janaab ka faq der tak raha..

Yun to kayi kitaabein padhin zehn mein magar,
Mahfuz ek saada waraq der tak raha..

Aksar shab-e-wisaal tere roothne ke baad,
Ahsaas par tilism-e-ramaq der tak raha..

Ab hai kitaab-e-ishq mein jo saada o salees,
Pahle wo lafz lafz-e-adaq der tak raha..

Suraj ke sar ko shaam ke neze pe dekh kar,
Dast-e-zameen pe rang-e-shafaq der tak raha,

Us ka jawaab ek hi lamhe mein khatm tha,
Phir bhi mere sawaal ka haq der tak raha..

'Bekal' jise bhula ke zamana hai mutmaeen,
Tujh ko hi yaad wo bhi sabaq der tak raha.!!

"Bekal Utsahi"
__________

Qalaq = regret, discomfort, trouble, anxiety,
Faq = Lost, wan, pale,
Tilism-e-ramaq = talisman, magic of a spark, ray, particle,
Salees = virtuous,
Lafz-e-adaq = difficult word,
Rang-e-shafaq = color of rainbow,