Main jab bhi koi achhoota kalaam likhta hun,
To pahle ek ghazal tere naam likhta hun,
Badan ki aanch se sanwla gaye hain pairahan,
Main phir bhi subah ke chehre pe shaam likhta hun,
Chale to tootein chattanein ruke to aag lage,
Shameem-e-gul ko to naazuk-khiraam likhta hun,
Ghataayen jhoom ke barsin jhulas gayi kheti,
Ye haadsa hai ba-sad-e-ahtiraam likhta hun,
Zameen pyasi hai boodha gagan bhi bhookha hai,
Main apne ahd ke qisse tamaam likhta hun,
Chaman ko auron ne likkha hai may-kada bar dosh,
Main phool phool ko aatish-ba-jaam likhta hun,
Na raabta na koi rabt hi raha 'Bekal',
Us ajnabi ko magar main salaam likhta hun.!!
"Bekal Utsahi"
No comments:
Post a Comment