Meri Ghazal Ki Tarah Us Ki Bhi Hukumat Hai

Meri ghazal ki tarah us ki bhi hukumat hai,
Tamaam mulk mein wo sab se khoobsurat hai,

Kabhi kabhi koi insaan aisa lagta hai,
Puraane shahar mein jaise nai imaarat hai,

Jami hai der se kamre mein gheebaton ki nashist,
Faza mein gard hai mahaul mein kudoorat hai,

Bahut dinon se mere saath thi magar kal shaam,
Mujhe pata chala wo kitni khoobsurat hai,

Ye zaa'iraan-e-aligarh ka khaas tohfa hai
Meri ghazal ka tabarruk dilon ki barkat hai.!!

"Basheer Badr"
___
Gheebaton = backbites,
Nashist = gathering/ assembly,
Zaa'iraan-e-aligarh = visitors of Aligarh,