May-kada Tha Chandni Thi Main Na Tha

May-kada tha chandni thi main na tha,
Ek mujassam be-khudi thi main na tha,

Ishq jab dam todta tha tum na the,
Maut jab sar dhun rahi thi main na tha,

Toor par chheda tha jis ne aap ko,
Wo meri deewangi thi main na tha,

Wo haseen baitha tha jab mere qareeb,
Lazzat-e-hum-saaigi thi main na tha,

May-kade ke mod par rukti hui,
Muddaton ki tishnagi thi main na tha,

Thi haqeeqat kuchh meri to is qadar,
Us haseen ki dil-lagi thi main na tha,

Main aur us ghuncha-dahan ki aarzu,
Aarzu ki saadgi thi main na tha,

Jis ne mah-paaron ke dil pighla diye,
Wo to meri shaairi thi main na tha,

Gesuon ke saaye mein aaram-kash,
Sar-barahna zindagi thi main na tha,

Dair o kaaba mein 'Adam' hairat-farosh,
Do-jahaan ki bad-zani thi main na tha.!!

"Abdul Hameed Adam"
__________

Mujassam = corporeal, incarnate, 
Lazzat-e-hum-saaegi = Relish; pleasure of being under the same shadow; proximity; intimacy; neighbourly;
Ghuncha-dahan = bud-faced,
Mah-paaron = moon-faced, beautiful damsels,
Sar-barahna = bare headed, one who is dist-ressed,
Hairat-farosh = seller of wonder,
Bad-zani = Jealousy,